Сібір жарасы

Сібір жарасы – аса қауіпті жұқпалы ауру. Ауру адамға ауру жануарлардан беріледі. Олардың ішіндегі ауруға ең сезімталы – ұсақ және ірі қара малдар, түйелер, жылқылар және басқа да шөпқоректілер болып келеді.

Қазіргі уақытта сібір жарасының пайда болу факторларының бірі – күннің қатты ысып кетуі, табиғи азықтың жетіспеушілігі, жануарларды тыйым салынған жерлерде жаю болуы мүмкін. Жануарлар сібір жарасы спораларын шөптермен және өсімдік тамырларымен бірге топырақты жеу арқылы жұқтыруы мүмкін. Адам өз кезегінде – ауру жануарларға күтім жасағанда, оны сойғанда, тұтас етін бөлшектегенде, мәйіттерді көмгенде, мал шаруашылығы өнімдерімен байланыста болған кезде жұқтыруы мүмкін.

Сібір жарасының тері түрінің инкубациялық кезеңі 2 күннен 14 күнге дейін созылады. Бастапқыда жарақат орнында қызыл дақ пайда болады, ол тері деңгейінен жоғары көтеріледі. Біраз уақыттан кейін жара қатты қышып және жарақат айналасының қызуы пайда болады. Жараның айналасында терінің ісінуі мен қызаруы байқалады. Негізгі белгілері – ойық жара аймағында сезімталдықтың төмендеуі немесе толық болмауы. Науқастың дене қызуының 39-40 градусқа дейін көтерілуі, жалпы әлсіздік, қатты бас ауруы және бас айналуы. Дәрігерге уақтылы жүгініп және арнайы ем қабылдаған жағдайда науқас толық емделіп шығады.

Сібір жарасының негізгі алдын алу ережелері:

1. Сібір жарасының топырақты ошақтарында мал жаюға, ауру жануарларды жасырын союға және олардың өнімдерін сатуға тыйым салу. Мал сою тек ветеринарлық дәрігерінің рұқсатымен жүргізілуі тиіс.

2. Мал өнімдерін тек ветеринарлық тексеруден өтетін арнайы базарлардан немесе дүкендерден сатып алу.

3. Сүт және ет өнімдерін белгіленбеген сауда орындарынан немесе кездейсоқ адамдардан сатып алмаған жөн.

4. Малмен айналысу кезінде гигиена ережелерін сақтау, арнайы киім мен қорғаныс құралдарын қолдану қажет.

5. Егер алғашқы күдікті белгілер пайда болған жағдайда, дер кезінде дәрігерге хабарласу қажет.

6. Жануарларға және халықтың тәуекел тобындағы адамдарға профилактикалық егу жұмыстарын жүргізу қажет.